Devid Qarrett

D. Qarrettin krossover (sintez) üslubunun əsasında ciddi klassik təhsil dayanır. Nyu-Yorkun nüfuzlu Juliard (Juilliard) İncəsənət Məktəbində İtsak Perlmanın (Itzhak Perlman) sinfində təhsil alan sənətçi klassik ənənəni öz dövrünün musiqisi ilə dialoqa gətirməyi şüurlu bədii seçimə çevirib. O, iki ayrı janr arasında keçid etmir; klassik virtuozluğu məqsədyönlü şəkildə pop və rok musiqisinin enerjisi ilə birləşdirir. Bu yanaşma qarşılaşma, dialoq və müxtəlif sənət dünyalarının qovuşması üzərində qurulan BIAF-ın ikinci mövsümünün konsepsiyası ilə səsləşir.

BIAF-da Devid Qarrett Sofiya Qubaydulina adına Müasir Musiqi Mərkəzinin Orkestri ilə birlikdə “Minilliyin simfoniyası” (“Millennium Symphony”) proqramını təqdim edəcək. O, bu proqramı şəxsi krossover (sintez) təkamülünün növbəti mərhələsi hesab edir. Günümüzdə simfonik musiqi ilə populyar mədəniyyəti bu qədər təbii və geniş miqyasda birləşdirə bilən sənətçilərə az rast gəlmək olur.

Proqram pop, rok, klassik və kino musiqisinin ən məşhur ifaçı və bəstəkarlarının əsərlərini janr sərhədlərini aşan irimiqyaslı və özünəməxsus bir retrospektivdə bir araya gətirir. Bu, “The White Stripes”, Beyons, “Maroon 5”, Şon Mendes, Harry Stayls, “Tones and I” (Toni Vatson), Hozier, dicey Aviçi (Avicii), Ed Şiran, Luis Fonsi və Deddi Yanki (Daddy Yankee), “Rammstein”, “The Weeknd”, Rihanna, “Destiny’s Child”, “Måneskin”, “Nirvana”, “Aerosmith”, Maykl Cekson, Lüdviq van Bethoven, Hans Zimmer, Devid Getta və Teylor Svift kimi musiqisi nəsillərin zövqünü formalaşdırmış ifaçı və bəstəkarlara simfonik ehtiram əlamətidir.